ഐഎംഎ സംസ്ഥാന സമ്മേളനത്തിന് ഇന്ന് തുടക്കമാകും.

ഇന്ത്യന്‍ മെഡിക്കല്‍ അസോസിയേഷന്‍ (ഐഎംഎ) കേരള ഘടകത്തിന്റെ 67-ാം സംസ്ഥാന സമ്മേളനം ഇമാകോണ്‍-2024 ഇന്നും (ശനി) നാളെ (ഞായര്‍) യുമായി പുഴയ്ക്കല്‍ ലുലു കണ്‍വെന്‍ഷന്‍ സെന്ററില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. 

സി.ഡി. സുനീഷ്.

തൃശൂര്‍: 

ഇന്ത്യന്‍ മെഡിക്കല്‍ അസോസിയേഷന്‍ (ഐഎംഎ) കേരള ഘടകത്തിന്റെ 67-ാം സംസ്ഥാന സമ്മേളനം ഇമാകോണ്‍-2024 ഇന്നും (ശനി) നാളെ (ഞായര്‍) യുമായി പുഴയ്ക്കല്‍ ലുലു കണ്‍വെന്‍ഷന്‍ സെന്ററില്‍ നടക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. ഐഎംഎ തൃശൂര്‍ ബ്രാഞ്ചാണ് സമ്മേളനം സംഘടിപ്പിക്കുന്നത്.

ഐഎംഎയുടെ 115 ബ്രാഞ്ചുകളില്‍ നിന്നായി അയ്യായിരത്തോളം ഡോക്ടര്‍മാര്‍ രണ്ടു ദിവസത്തെ സമ്മേളനത്തില്‍ പങ്കെടുക്കും. സംസ്ഥാനത്തെ വിവിധ മെഡിക്കല്‍ കോളജുകളില്‍ നിന്നും മുന്നോറോളം പിജി വിദ്യാര്‍ഥികളും സമ്മേളനത്തിനെത്തും. ഇന്ന് (ശനി) രാവിലെ 8ന് ഐ.എം.എ. സംസ്ഥാന പ്രസിഡന്റ്  ഡോ. ജോസഫ് ബെനവന്‍ പതാക ഉയര്‍ത്തുന്നതോടെ സമ്മേളനത്തിന് തുടക്കമാവും. രാവിലെ 9ന്  ഐഎംഎ സംസ്ഥാന കൗണ്‍സില്‍ യോഗം നടക്കും. സംഘടനാ കാര്യങ്ങളെ കുറിച്ച് വിശദമായ ചര്‍ച്ചകളും അവലോകനങ്ങളും യോഗത്തില്‍ നടക്കും. കഴിഞ്ഞ ഒരു വര്‍ഷത്തിനിടെ സംസ്ഥാനത്ത് മരണപ്പെട്ട 100 ഡോക്ടര്‍മാരെ പ്രവര്‍ത്തക സമിതി യോഗം അനുസ്മരിക്കും.

നാളെ (ഞായര്‍) രാവിലെ 10ന് നടക്കുന്ന പൊതു സമ്മേളനം കേന്ദ്രമന്ത്രി സുരേഷ് ഗോപി ഉദ്ഘാടനം ചെയ്യും. ഐ.എം.എ സംസ്ഥാന പ്രസിഡന്റ്  ഡോ. ജോസഫ് ബെനവന്‍ അധ്യക്ഷത വഹിക്കും. ആരോഗ്യമന്ത്രി വീണ ജോര്‍ജ് മുഖ്യപ്രഭാഷണം നടത്തും. റവന്യു മന്ത്രി കെ രാജന്‍, ആരോഗ്യ സര്‍വകലാശാല വൈസ് ചാന്‍സലര്‍ ഡോ.മോഹനന്‍ കുന്നുമ്മല്‍ എന്നിവര്‍ മുഖ്യാതിഥികളായിരിക്കും. എംഎല്‍എ പി ബാലചന്ദ്രന്‍, ആരോഗ്യ-കുടുംബ ക്ഷേമ അഡീഷണല്‍ ചീഫ് സെക്രട്ടറി ഡോ. രാജന്‍ ഖോബ്രഗഡേ,  ഐഎംഎ ദേശീയ പ്രസിഡന്റ് ഡോ. ആര്‍ വി അശോകന്‍, ഐഎംഎ മുന്‍ ദേശീയ പ്രസിഡന്റ് ഡോ. മാര്‍ത്താണ്ഡ പിള്ള, ഐഎംഎ സംസ്ഥാന സെക്രട്ടറി ഡോ.കെ ശശിധരന്‍, സംഘാടക സമിതി ചെയര്‍മാന്‍ ഡോ. പി ഗോപികുമാര്‍, സംഘാടക സമിതി സെക്രട്ടറി ഡോ. ജോസഫ് ജോര്‍ജ് എന്നിവര്‍ സംസാരിക്കും. ഇന്ത്യന്‍ മെഡിക്കല്‍ അസോസിയേഷന്റെ 2024-25 വര്‍ഷത്തേക്കുള്ള  സംസ്ഥാന ഭാരവാഹികളുടെ സ്ഥാനാരോഹണവും ചടങ്ങില്‍ നടക്കും. ഐഎംഎ ദേശീയ പ്രസിഡന്റ് ഡോ. ആര്‍ വി അശോകന്‍ സ്ഥാനാരോഹണച്ചടങ്ങുകള്‍ക്ക് നേതൃത്വം നല്‍കും. സംസ്ഥാനത്തെ മികച്ച ഐഎംഎ ബ്രാഞ്ചിനും മികച്ച പ്രവര്‍ത്തകര്‍ക്കുമുള്ള പുരസ്‌ക്കാരങ്ങളും സമ്മാനിക്കും.

ആരോഗ്യ മേഖലയിലെ വിദഗ്ദര്‍ ആധുനിക വൈദ്യശാസ്ത്ര രംഗത്തെ ഇരുപതോളം വ്യത്യസ്ത വിഷയങ്ങളില്‍ പ്രബന്ധങ്ങള്‍ അവതരിപ്പിക്കും. പൊതുജനാരോഗ്യം - ആശങ്കാജനകമായ പ്രവണതകള്‍, സുരക്ഷിതമായ ഭക്ഷണ സംസ്‌ക്കാരം തുടങ്ങി വിവിധ വിഷയങ്ങളില്‍ ചര്‍ച്ചകള്‍ നടക്കും. സമ്മേളനത്തിന്റെ ഭാഗമായി ശില്‍പ്പശാലകളും നടക്കും. ആരോഗ്യരംഗത്തെ വിവിധ മേഖലകളെ സമന്വയിപ്പിച്ച് എഴുപതോളം സ്റ്റാളുകളും ഒരുക്കും. ഭാഗ്യരാജിന്റെ നേതൃത്വത്തില്‍ സംഗീത പരിപാടിയും നടക്കും.

ഐഎംഎ നിയുക്ത സംസ്ഥാന പ്രസിഡന്റ് ഡോ. കെ എ ശ്രീവിലാസന്‍, സംസ്ഥാന വൈസ് പ്രസിഡന്റ് ഡോ. ജെയിന്‍ ചിമ്മന്‍, സംസ്ഥാന സെക്രട്ടറി ഡോ.കെ ശശിധരന്‍, സംഘാടക സമിതി ചെയര്‍മാന്‍ ഡോ. പി ഗോപികുമാര്‍, സംഘാടക സമിതി സെക്രട്ടറി ഡോ. ജോസഫ് ജോര്‍ജ് എന്നിവർ വാര്‍ത്താസമ്മേളനത്തില്‍ പങ്കെടുത്തു.