കടുത്ത ചൂട്; ചരിത്രാതീത ഹീറ്റ് വേവ് മുന്നറിയിപ്പ് “മനസ്സിലാക്കാം… പ്രതിരോധിക്കാം… അതിജീവിക്കാം”

തമിഴ്നാട്ടിൽ ചരിത്രത്തിലെ ഏറ്റവും കടുത്ത വേനൽച്ചൂട് അനുഭവപ്പെടുന്നതായി മുന്നറിയിപ്പ്. കഴിഞ്ഞ കുറച്ച് വർഷങ്ങളായി ഉയർന്നുവരുന്ന താപനില 2024-25 കാലഘട്ടത്തിൽ കൂടുതൽ രൂക്ഷമായി മാറിയിരിക്കുകയാണ്. നിരവധി ജില്ലകളിൽ 40 ഡിഗ്രി സെൽഷ്യസിന് മുകളിൽ താപനില രേഖപ്പെടുത്തിയതോടെ ജനജീവിതം പ്രതിസന്ധിയിലായി.

നമ്മുടെ കേരളത്തിലും ചൂട് തരംഗം എല്ലാ കാലത്തേക്കാളും കൂടി വരികയാണ്, ഈ വർഷം മഴ കുറയും ചൂട് കൂടും എന്നാണ് കാലാവസ്ഥ നിരീക്ഷണ വകുപ്പ് അറിയിക്കുന്നത്.

വിദഗ്ധർ പറയുന്നതനുസരിച്ച്, ആഗോളതാപനം, നഗരങ്ങളിലെ “ഹീറ്റ് ഐലൻഡ്” പ്രതിഭാസം, പച്ചപ്പിന്റെ കുറവ്, മലിനീകരണം എന്നിവയാണ് ചൂട് അസഹനീയമാക്കുന്ന പ്രധാന കാരണങ്ങൾ. കാടുകൾ ഇല്ലാതാകുകയും ജലാശയങ്ങൾ നശിക്കുകയും ചെയ്യുന്നതോടെ ഭൂമിയുടെ സ്വാഭാവിക തണുപ്പ് നഷ്ടപ്പെടുകയാണെന്നും റിപ്പോർട്ടുകൾ ചൂണ്ടിക്കാട്ടുന്നു.

മനുഷ്യർക്കു അനുയോജ്യമായ താപനില എത്ര?

ആരോഗ്യകരവും സുഖപ്രദവുമായ അന്തരീക്ഷത്തിനായി 24°C മുതൽ 30°C വരെയുള്ള താപനിലയാണ് അനുയോജ്യമെന്ന് വിദഗ്ധർ പറയുന്നു. എന്നാൽ 35°C കഴിഞ്ഞാൽ ദീർഘസമയം ചൂടിൽ കഴിയുന്നത് ഹീറ്റ് സ്ട്രോക്ക്, നിർജലീകരണം, ക്ഷീണം തുടങ്ങി ഗുരുതര ആരോഗ്യപ്രശ്നങ്ങൾക്ക് ഇടയാക്കാം.

ജനങ്ങൾ ശ്രദ്ധിക്കേണ്ട കാര്യങ്ങൾ

ധാരാളം വെള്ളം, ORS, മോര്‍, പഴച്ചാറുകൾ എന്നിവ കുടിക്കുക

ഉച്ചയ്ക്ക് 12 മുതൽ 4 വരെ പുറത്തിറങ്ങുന്നത് ഒഴിവാക്കുക

ഇളം നിറത്തിലുള്ള കാട്ടൺ വസ്ത്രങ്ങൾ ധരിക്കുക

കുട്ടികൾ, വയോധികർ, പുറംതൊഴിലാളികൾ എന്നിവർക്ക് കൂടുതൽ കരുതൽ നൽകുക

കാലാവസ്ഥാ വകുപ്പ് നൽകുന്ന ഹീറ്റ് അലർട്ടുകൾ ശ്രദ്ധിക്കുക

ഭാവിക്കായി ചെയ്യേണ്ടത്

പരിസ്ഥിതി സംരക്ഷണമാണ് ദീർഘകാല പരിഹാരമെന്ന് വിദഗ്ധർ മുന്നറിയിപ്പ് നൽകുന്നു.

കൂടുതൽ മരങ്ങൾ നട്ടുപിടിപ്പിക്കുക

കായലുകളും ജലാശയങ്ങളും സംരക്ഷിക്കുക

നഗരങ്ങളിൽ ഗ്രീൻ റൂഫുകളും കൂടുതൽ പാർക്കുകളും ഒരുക്കുക

വാഹന ഉപയോഗം കുറച്ച് മലിനീകരണം നിയന്ത്രിക്കുക

സൗരോർജ്ജം പോലുള്ള പരിസ്ഥിതി സൗഹൃദ മാർഗങ്ങൾ പ്രോത്സാഹിപ്പിക്കുക

“കൂടുതൽ മരങ്ങൾ… കുറവ് ചൂട്”

വലിയ മരങ്ങൾ തണലും ശുദ്ധവായുവും നൽകുമ്പോൾ ചെറുമരങ്ങളും ഭാവിയുടെ പച്ചപ്പിനുള്ള നിക്ഷേപമാണെന്ന് ക്യാമ്പയിൻ ഓർമ്മിപ്പിക്കുന്നു. വീടുകൾ, സ്കൂളുകൾ, റോഡരികുകൾ, ഒഴിഞ്ഞിടങ്ങൾ എന്നിവിടങ്ങളിൽ കൂടുതൽ വൃക്ഷത്തൈകൾ നട്ടുപിടിപ്പിക്കണമെന്ന് ആഹ്വാനം ചെയ്യുന്നു.

“ഇന്ന് ചെറിയൊരു മാറ്റം… നാളെയൊരു വലിയ വ്യത്യാസം” എന്ന സന്ദേശവുമായി ജനങ്ങൾ ഒന്നിച്ച് ചൂടിനെതിരായ പോരാട്ടത്തിൽ പങ്കാളികളാകണമെന്ന് പൊതുജനങ്ങളോട് അഭ്യർത്ഥിച്ചിട്ടുണ്ട്.